Велешката авторка Лила Арсова денеска, на Светскиот ден на литературата за деца, ја промовираше нејзината осма книга „Детски мечти“.
„Сите мои дела се наменети за децата и младите, иако книгата нема возрасна граница. Уживам додека ги пишувам, уживам додека ги читам, уживам додека ги раскажувам“, кажа Арсова, која е одделенски наставник во подрачното училиште на ОУ „Васил Главинов“.
Книгата „Детски мечти“ е наградена на конкурсот „Пелистерски ракувања“ од Битола. Промотор на книгата беше проф. д-р Васил Тоциновски.
„Новата книга на Арсова е концепт кој нуди седум приказни, бајки, за секој ден од седмицата по една. Централна личност е детето, кое е секундарна појава, бидејќи сѐ околу него е она што ја интересира авторката. Тоа се домот, семејството, традицијата, пријателството. Детските мечти се филозофија за пријателство и другарување на детето со животните и растителниот свет“, кажа Тоциновски.
П. ПЕЧКОВ
