Пијанистот Дино Имери одржа концерт во концертната сала на Кралскиот колеџ во Лондон, по повод 30 години дипломатски односи помеѓу Македонија и Обединетото Кралство на Велика Британија и Северна Ирска.
„Ми беше огромна чест да ја претставувам Македонија и да ја промовирам нашата култура во овој светски центар на уметноста, во престижната концертна сала на Кралскиот колеџ, каде што настапуваат врвни уметници од целиот свет“, рече македонскиот пијанист.
Во публиката беа и специјалниот пратеник на британскиот премиер за Западен Балкан, Лорд Пич и министерката за култура Бисера Костадиновска-Стојчевска.
Имери свиреше обработка на македонската песна „Јас те пратив на вода Калино“, како и композиции од Дамир Имери („Пајдушко“ и „Сербез Донка“) и од Дијана Илкоска-Имери („Корени“). Заедно со него настапи хрватскиот пијанист Ведран Јањанин.
