Дани со песната „Пијана“ беше топло пречекана од публиката на Макфест, на кој се врати по пет години пауза. Музиката и текстот се на Весна Малинова, а аранжманот на Јордан Манов.
„‘Пијана’ вибрира љубовно со позитивен пристап кон себе. Опиени од љубов и среќа е убаво ‘пијанство’ за да немам време да мразам и на луѓе да газам“, ни рече Дани Димитровска во Штип.
Таа сними и спот заедно со „2by4 продукција“. Го монтираше Ени Вучидолова
„Реални сопнувања, паѓања и будалаштини се задржани и прикажани во видеото како потсетник на тоа дека сме живи луѓе, создадени за слобода, емотивна размена и соединување“, вели Дани.
Наскоро ќе слушнеме уште една нова песна од Дани, за која вели дека е најразлична од сѐ што снимила досега, но се надева дека ќе ѝ се допадне на публиката затоа што има важна порака да пренесе. Пејачката вели дека веќе закажала концерт во Скопје, на 4 октомври 2025 во Филхармонијата.
М. ЏАРОВСКА
