Претседателката Гордана Сиљановска-Давкова денеска на официјална церемонија со највисоки државни и воени почести ја презеде функцијата од досегашниот претседател Стево Пендаровски.
На инаугуративна седница во Собранието, Сиљановска-Давкова даде свечена изјава за стапување на функцијата претседател во мандатниот период 2024 – 2029.
При изговорањето на заклетвата, т. е. повторувајќи ги зборовите на претседателот на Собранието Јован Митрески, таа не кажа дека дава заклетва како претседателка на Република Северна Македонија, туку само на Македонија. Силјановска-Давкова ја потпиша свечената изјава на која пишува Република Северна Македонија, исто како и на Уверението за Претседател на Република Северна Македонија кое вчера го прими во Државната изборна комисија (ДИК).
Грчката амбасадорка Софија Филипиду, која заедно со колегите амбасадори дојде да ја проследи седницата на Собранието за инаугурација на Сиљановска-Давкова за претседателка на државата, ја напушти пленарната сала. Заминувањето е во знак на протест поради тоа што Сиљановска-Давкова не го употреби уставното име на земјава.
Потоа, реагираше и претседателката на Европската комисија Урсула фон дер Лајен која изјави: „За Северна Македонија да го продолжи својот успешен пат кон пристапувањето во ЕУ, најважно е земјата да продолжи по патот на реформите и целосно почитување на нејзините обврзувачки договори, меѓу кои и Договорот од Преспа“.
А претседателот на Европскиот совет Шарл Мишел рече: „Многу е разочарувачки што новата претседателка на Северна Македонија не го употреби уставното име на државата на денешната церемонија на заклетва. ЕУ потсетува на важноста од континуирано спроведување на правно обврзувачките договори, вклучувајќи го и договорот од Преспа со Грција“.
Грчкото Министерство за надворешни работи подоцна објави соопштение во кое се вели дека активностите на новaта претседателка го прекршиле договорот меѓу двата народи и ги ставаат во опасност билатералните односи и изгледите на Северна Македонија за пристапување во Европската унија.
Сиљановска-Давкова е шести претседател и прва жена на оваа функција од осамостојувањето на државата.
Говорот таа им го посвети на жените кои, рече, се оние заради кои се нафатила да се кандидира за оваа должност и затоа што сака да ги инспирира дека е можно во земјава и жена да стане претседател на државата.
Нагласи дека довербата е многу важна и таа ќе ја оправда затоа што ја добила оваа можност и затоа што, рече, добила шанса да биде опкружена со многу жени.
Првиот и основен критериум за дружење со неа ќе биде стручност и компетентност, а владеење на правото е тоа што оваа држава, рече, ќе ја направи европска, а не „владеење на малкумина, не владеење на мажите“.
„Во ова собрание ќе ги читам законите и ќе се обидам да укажан на женски начин ако дојде до вето. Кога ќе именувам и кога предлагам членови на кој било орган, се разбира дека ќе тргнувам од стручноста и компетентноста. За жал, жените ги нема во политиката и затоа сум среќна дека ќе инспирирам други жени. Ако можам јас да бидам претседателка, можете и вие. Оваа држава не ја бранеле, не ја имаме благодарение само на комитите, туку и на комитките како Сирма Војвода. Не само на партизаните, туку и на партизанките како Вера Циривири-Трена, Вера Јоциќ, Ибе Паликуќа. Многу храбри и умни жени сум видела во овој парламент. Зад успешни жени стојат прекрасни мажи како мојот сопруг“, рече претседателката.
(Фото: Ѓ. Личовски)
