Володимир Зеленски редовно, речиси секојдневно, им се обраќа на Украинците од почетокот на руската инвазија на 24 февруари. Облечен во војничка маица, тој држи емотивни и мотивирачки говори, преку кои се обидува да го крене моралот на нацијата, особено на вооружените сили и да ја придобие меѓународната заедница. Говорите во кои што ги истакнува храброста и непоколебливоста на Украинците секој пат ги завршува со зборовите „Слава на Украина“.
Автор на овие говори е 38-годишниот новинар и политички аналитичар Дмитро Литвин, кој за весникот „Гардијан“ откри дека идеите за говорите потекнуваат од самиот Зеленски.
„Претседателот секогаш знае што сака да каже и како да го каже тоа. Во говорите најважни се емоциите. Мислам дека други лидери би можеле да научат од Зеленски како да ги комбинираат искреноста и емоционалната сила“, вели Литвин.
Тој е дел од најтесниот круг на Зеленски, при што соработува со неговиот советник, новинарот Серхиј Лешченко.
Говорите што ги прави Литвин несомнено имаат ефект. Анкетите велат дека 95% Украинци веруваат дека земјата може да ѝ се спротивстави на инвазијата, додека рејтингот на Зеленски нагло порасна од март наваму.
