Изложбата „Саботна ноќна треска“ на авторите Марија Ветероска, Игор Сековски и Иван Блажев ќе се отвори утре (1 октомври) во македонскиот КИЦ во Белград.
Трите автори изложуваат дела на една заедничка тема, но низ три различни изразни форми. Делата на Сековски и Ветероска се комбинација на видео и просторна инсталација, додека Блажев се претставува со фотографии. Куратор на изложбата е д-р Ана Франговска.
„‘Саботна ноќна треска‘“ е евокативен наслов кој веднаш создава слики од општествениот живот, славењето и енергичната урбана култура. Сепак, во контекст на овој проект, насловот станува длабоко ироничен, не одразувајќи го раздвижениот ноќен живот некогаш поврзан со Скопје, туку повеќе е критика на современото разочарување од градот. Уметниците Игор Сековски, Иван Блажев и Марија Ветероска ја користат својата работа за да ги истражат социјалната, психолошката и урбаната фрагментација што сега го дефинира животот во Скопје. Изложбата не претставува само носталгичен копнеж за минатото, туку длабоко се занимава со критичката урбана теорија, егзистенцијалната филозофија и постмодерната критика на современиот живот“, вели Франговска.
Изложбата, која првпат беше поставена во Скопје во 2024, се реализира со финансиска поддршка од Министерството за култура и туризам.
