Првиот македонски долгометражен анимиран филм „Јон Вардар против галаксијата“ од вчера (27 март) се прикажува во киносалите во Унгарија.
Филмот викендов имаше специјална проекција за новинари и претставници на филмската индустрија во Будимпешта, во присуство на режисерот Гоце Цветановски и екипата од Унгарија која работеше на проектот.
„Унгарија последна влезе во копродукција, но прва ја заврши својата работа и тоа го направи одлично. Благодарен сум му на целиот унгарски тим, чиј придонес беше од суштинско значење за овој проект“, рече режисерот Цветановски.
„Јон Вардар“ е синхронизиран на унгарски јазик, а гласовите ги позајмуваат познатите актери Тамаш Маркович, Миклош Капачи и Герда Пикали.
Филмот е копродукција помеѓу Македонија, Унгарија, Бугарија и Хрватска и е поддржан од Агенцијата за филм. Светската премиера ја имаше во октомври на 57. издание на Фантастик филм фестивал во шпанскиот град Ситџес, еден од најголемите и најстари жанровски фестивали во светот, а набргу потоа беше и домашната на фестивалот Киненова.
