Долгометражниот филм за гевгелискиот професор Илија Џаџев вечерва од 21 часот премиерно ќе биде прикажан на фестивалот на креативен документарен филм МакеДокс.
Во режија на Јордан Дуков, кој е и автор на сценариото, „Професорот“ го следи необичниот животен пат на Џаџев (1926-1991): музичар, гитарист, поет, филозоф и професор по географија, кој одржал повеќе од 6.000 бесплатни концерти низ светот и пропатувал четири милиони километри.
Директори на фотографија се Кристијан Караџовски и Доријан Миловановиќ, кој ја правеше и монтажата. Филмот кој трае 75 минути е во продукција на „Кадар“ и „Машина продукција“.
