Утре (22 јуни) од 20 часот, во Социјалниот центар „Дуња“ во Скопје ќе се одржи 33. издание на серијалот „Џез за чудаци“, на кое ќе настапат групата „Светлост“ (фото) и дуото Филип Букршлиев (електрична гитара) и Никола Ивановски (труба). Настанот е во коорганизација на „Аксиома“, „Светлост“, „Џез за чудаци“ и СЦ „Дуња“.
Вечерта ќе ја отвори дуото Букршлиев–Ивановски, кое вели дека преку слободна импровизација и истражувачки пристап создава звук надвор од класичните музички рамки.
„Светлост“, ќе настапи со спој на слободен џез, панк и експериментален звук.
„Нивните настапи се препознатливи по интензивната атмосфера и силното колективно доживување. Серијалот ‘Џез за чудаци’ и овојпат ќе остане доследен на својата мисија, да претстави музика што излегува од жанровските рамки и отвора простор за нетипични, авантуристички звучни искуства“, велат организаторите.
Влезот е 300 денари, а 200 денари за студенти и невработени.
