Еден од најголемите фински метал бендови „Аморфис“ ќе настапи во Скопје во ноември во рамките на вториот дел од својата европска турнеја „Хало“. Концертот ќе се одржи на 2 ноември во Младински културен центар, во организација на „Пасворд продукција“, која своевремено го донесе „Аморфис“ и на Таксират.
Специјални гости на турнејата се еден од најпопуларните исландски метал бендови „Solstafir“ и „Lost Society“ од Финска.
Основан во 1990 како дет метал група, „Аморфис“ со тек на време го менуваше звукот, па денес е најблиску до мелодичен хеви метал стил. Основата на бендот ја сочинуваат гитаристите Еса Холопаинен и Томи Коивусери, а со сегашниот пејач Томи Јоутсен е од 2004 година.
„Хало“, кој излезе лани, е 14. студиски албум на групата за 30 години.
Продажбата на билетите почнува в петок, по промотивна цена од 1.000 денари.
Г. КОНЕВ
