Eкипа од Канал 103 ќе учествува во програмата „Радио дом“ со сестринското радио „Кашмир“ од Берлин.
„Програмата се развива како отворен процес на слушање, учење и истражување, обликувана низ живи и претходно снимени емисии, спонтани радиомоменти, разговори и теренски снимања. Започнува со воведно вклучување на 2 јуни во 19:30 часот, кое ги поврзува Скопје и Берлин, а завршува на 10 јуни со заедничка програма“, велат од Канал 103.
За време на престојот, Рина Јанкуловска, Теодор Симоновски, Матеј Борисов и Бранко Бјадов ќе го истражуваат радиото како медиум на заедницата и простор за поврзување, учење, експеримент и културна размена, како што велат, во еден поинаков, слободен и космополитски контекст. „Радио дом“ е дел од пошироката програма за одбележување на 35 години Канал 103 и продолжение на долготрајната соработка со радиото „Кашмир“.
„Проектот се реализира во период кога Стотројка ја создава својата програма во егзил, без пристап до сопственото студио. Резиденцијата е поддржана од програмата ‘Културата ја движи Европа‘“, велат од Канал 103.
