Оркестарот на Филхармонијата денеска (8 октомври) од 20 часот ќе одржи концерт насловен „Музички код“. Ќе диригира Борјан Цанев. На програмата се увертири од познати оперски дела на Моцарт, Росини и Вагнер, како и „Кориолан“ од Бетовен, „Академска фестивалска увертира“ од Брамс и „Свечена увертира“ од Шостакович.
Борјан Цанев е еден од најистакнатите македонски диригенти, со богата меѓународна кариера. Дваесет години беше главен диригент на Филхармонијата, а денес е редовен професор на Факултетот за музичка уметност во Скопје.
Во 2015 ја предводеше Филхармонијата на нејзиното прво гостување во САД, со концерти во њујоршките сали „Карнеги хол“ и „Кауфман“. Добитник е на наградите „Виртуози“ и „Ѓорѓи Божиков“.
