Модата, музиката, фотографијата и уметноста од 1990-тите се во фокусот на изложбата „Деведесеттите: уметност и мода“, која денеска (8 октомври) се отвора во галеријата „Тејт Британија“ во Лондон. Изложбата ги истражува влијанието на една од најпрепознатливите децении во современата поп-култура и начинот на кој уметниците, модните дизајнери и фотографите го обликувале нејзиниот визуелен идентитет.
Преку фотографии, модни креации и уметнички дела, поставката ја претставува креативната енергија на 1990-тите, кога границите меѓу модата, музиката и современата уметност станале сè поневидливи.
Тоа е периодот кога супермоделите станале светски ѕвезди, модните списанија добиле огромно влијание врз популарната култура, а фотографијата и уличната мода почнале да диктираат нови трендови. Слика од Наоми Кембел од тој период е дел од изложбата (Фото).
Изложбата потсетува и на времето кога британската културна сцена имала силно меѓународно влијание, од музиката и модните писти до современата уметност. Посебен акцент е ставен на врската помеѓу модата и уметничкото изразување, како и на визуелните идеи што и денес се препознаваат во колекциите на светските модни куќи.
Изложбата во „Тејт Британија“ ќе биде отворена до 14 февруари 2027.
