Тони Зен по подолга пауза се враќа на музичката сцена со својот шести албум, насловен „Од изворот на изборот“. Како независно издание, албумот е снимен во студиото „Knobs Keys ‘n Stuff“ заедно со Бојан Филиповски, а миксот и мастерингот ги правеше Мите Димовски во студиото „Тралала“.
Албумот е акустичен и мирен и сите осум песни се инспирирани од личните искуства на Петковски во изминатите пет години.
„Музиката на албумот е посветена на вистината, љубовта и просветлението и повеќето текстови се инспирирани од духовните практики и искуства, стекнати во Институтот за хармоничен развој на човекот. Спознавањето кој сум јас, средбите со мајсторот и созревањето низ духовната патека се апсолутната инспирација за создавањето на овој албум. Насловот ‘Од изворот на изборот‘ значи стекнување свесност, односно дека секој е одговорен за сопствените искуства, одлуки и избори во животот“, објаснува Тони Петковски.
Наскоро ќе бидат промовирани и два нови спота, а албумот ќе се најде во продажба од 23 мај.
