Мијата го објави својот нов сингл „Ти биди СВОЈ“, за кој вели дека е мотивациско продолжение на нејзиниот најголем хит „Верувам во себе“.
Како што вели кантавторката, оваа песна е дел од нејзината душа и носи порака за слобода, автентичност и храброст да се биде свој.
Песната е целосно отсвирена во живо во студиото „Подрумот“ во Скопје. Авторка на музиката, текстот и дел од аранжманот е Мијата. Во песната свират Гоце Вангеловски на виолина, Бојан Димитровски на пијано, Кире Мирчовски и Јаков Ѓорговски на гитари, Иво Митковски на бас гитара и тапани, а кантри звукот го збогатува бенџото во изведба на Рики Миер од Калифорнија.
Мијата вели дека гостувањето на музичарот од Калифорнија носи симболика дека музиката нема граници. Аудио инженер и аранжер е Ангел Ќосев со кого таа повеќепати соработува. За видеото се избрани две локации во Македонија важни за Мијата, Пробиштип и Кучково. Таа е режисер на спотот, директор на фотографија е Сашо Доковски, а монтажата ја изработи Горан Цветковиќ. Во спотот учествува балетското студио „Магија“ од Пробиштип .
