Од 28 до 30 јуни, на повеќе сцени на отворено во Дојран, ќе се одржи традиционалниот „Д фестивал“, со домашни, балкански и странски музичари, објави на прес конференција „Пасворд продукција“.
„Имаме пораснато многу генерации за овие 14 години, имаме донесено над 400 музичари досега. ‘Д фестивал’ стана еден познат туристички бисер, и ја негува културата. Годинава, еднa од нашите главни акции е ‘Не биди дедо’. Со купени 4 влезници, петтата се добива гратис и е наменета за сите оние над 30 години, за да им докажеме дека животот почнува по 30-тата и дека треба да се забавуваме секогаш. Имаме програма за сите возрасти, а влезот на фестивалот за децата до 10 години е бесплатен“, рече на пресот Рамона Кочишки.
Првиот човек на „Пасворд“, Логин Кочишки низ насмевка рече дека годинава, на фестивалите кои ги организираат, вклучувајќи го „Таксират“ на 7 декември во Скопје, тој се повлекол од изборот на програмата во 99 проценти и затоа ќе забележиме освежување.
„Д фестивал“ речиси ја оформи својата листа на учесници, на која веќе се потврдени Лил Памп, Сама Абдулхади, Фатумата Дијавара, „Нувел ваг“, „Елементал“, „Санаториум“, „Корпорација вагина“, „Црно собрание“, Дебора Де Лука и други, а целосната програма е објавена на страницата на фестивалот.
М. ЏАРОВСКА
