Многу луѓе вчера (28 август) со аплауз го пречекаа младиот охридски пливач Марко Пејчиновски (19) на пристаништето во Охрид, кој за девет часа и 29 минути исплива 22 километри. Откако излезе од езерото, прв го прегрна неговиот татко.
Пејчиновски во април објави дека се подготвува за „Ајронмен триатлон“ со должина од 107 километри (трчање, возење велосипед и пливање), кој успешно го заврши за неполни 20 часа.
„Трчав седум часа и 47 минути, возев велосипед два часа и 33 минути и пливав девет часа и 29 минути. Пресреќен сум што со ваша поддршка успеав да го остварам предизвикот што самиот си го зададов“, рече Пејчиновски.
Патувањето на младиот спортист, кој има некроза на ногата, почна на 27 август во Свети Наум, од каде што трчаше до Струга. Потоа со велосипед се врати до Свети Наум и веднаш потоа оттаму со пливање стаса до Охрид.
„Предизвикот е ‘Ајронмен триатлон’, три маратони во едно, токму поради тоа што не можам да трчам и да скокам, што ме спречува да живеам нормален живот во последниве девет години. Тоа е најисцрпувачкиот, најискушителен и најтежок триатлон. За мене е малку потешко“, ни рече во април Пејчиновски, кога најави дека се подготвува за предизвикот.
„Новиот предизвик е доказ за ново утре. Мораме да се соочиме со проблемите, без разлика на болката што ни ја нанесуваат, бидејќи најголемата болка ќе дојде ако се откажеме. Предизвикот претставува токму тоа, челичен човек, бидејќи за да се успее во ваков триатлон, мора да си направен од челик. Кај мене, предизвикот е уште потежок, бидејќи е модифициран“, додаде Марко Пејчиновски.
Симболично, тој одлучи триатлонот да се одржи на 28 август, на празникот Голема Богородица и рече дека ќе нема временска граница за негово завршување.
На 12 години во 2018 Пејчиновски го преплива Охридското Езеро. Од Свети Наум тргна во 9:30 часот, а на Градското пристаниште во Охрид пристигна околу 18 часот по испливани 25 километри. На брегот тогаш имаше околу илјада охриѓани кои го пречекаа како херој, исто како и вчера.
М. ЏАРОВСКА
