Првата книга со рецензии за современата македонска музика на англиски јазик од утре ќе се најде во продажба во книжарниците „Литература.мк“, а официјална, онлајн промоција ќе има в понеделник.
Книгата „Press & Play“ (Притисни и слушај) е дело на Ненад Георгиевски и ги содржи неговите рецензии на албуми, концерти и фестивали кои беа објавени и на познатиот сајт „All About Jazz“. Меѓу музичарите и настаните кои се застапени во книгата се Влатко Стефановски, „Леб и сол“, Кирил Џајковски, „Фолтин“, Џијан Емин, Зоран Маџиров, „Анастасија“, Скопски џез фестивал и Офф-фест.
„Книгата претставува збир од мои текстови за македонската музичка култура кои ги имам пишувано 15 години за ‘All About Jazz‘. Се работи за рецензии на изданија и концерти на различни генерации македонски музичари. Тие текстови претставуваа единствен увид во тоа што се случувало на музички план во Македонија, но напишано на јазик и платформа каде што милиони читатели имале пристап“, вели Георгиевски.
Книгата е во издание на „Арс Либрис“, дел од „Арс Ламина – публикации“.
