Мачката Шупет, седумгодишниот миленик на Карл Лагерфелд, би можела да стане наследник на дел од неговото богатство од 150 милиони фунти, објави францускиот весник „Л‘Фигаро“, што е можно според германските закони. И самиот Лагерфелд, кој почина вчера на 85 години, го најави ова лани.
„Меѓу другите, да, и таа би можела да добие дел од наследството. Но, не грижете се, има доволно за сите“, кажа кралот на модата во интервјуто за магазинот „Нумеро“.
Ова не е никакво изненадување, имајќи предвид дека јавноста беше доста запозната со животот и навиките на Шупет. Таа се буди секој ден во 6.30 часот, се четка шест пати на ден и очите ѝ се чистат со „окрил“. Не е вегетаријанка, пие само прочистена вода, на располагање има телохранител, личен готвач и две помошнички, одвреме-навреме вежба мачја јога, а има и свој „ајпед“.
Шупет има заработено и лично богатство од три милиони долари, учествувајќи во две кампањи во 2014 година, за јапонски козметички бренд и за календар на една автокомпанија.
Лагерфелд, кој нема деца, кажа дека веднаш се вљубил во Шупет откако ја добил во 2012 година од францускиот модел Баптист Жијабикони.
