Претставата „Немам каде да се вратам“ ја освои Гран при наградата на 60. јубилејно издание на меѓународниот Драмски аматерски фестивал во Кочани. Претставата е во режија на Дени Стојанов, во изведба на театарот „Кунстверкштат“ од Скопје.
Во образложението на жирито во состав Борис Чоревски, Несрин Таир и Катерина Соколова стои дека претставата го добива највисокото признание „Васил Ќортошев“ за „квалитетна колективна игра со комплицирана естетика во изразувањето на сериозна светска проблематика“.
Кристина Николова е прогласена за најдобра актерка за улогата на Ева во претставата „Умри машки“, во режија на Томе Атанасов од Домот на културата „Мирка Гинова“ од Демир Капија, а наградата за машка главна улога ја доби Виктор Анѓелкоски за претставата „Бенг Бенг и мртов си“, во изведба на Центарот за култура „АСНОМ” од Гостивар.
