Шекспировата драма „Отело“, во режија на Нина Николиќ, премиерно ќе се изведе в среда од 20 часот во Македонскиот народен театар, како копродукција на Босанско народно позориште од Зеница, „Перипетија продукција“ и МНТ. Претставата пред 20-ина дена ја имаше босанската премиера во Зеница.
Во претставата играат актери од БиХ и од Македонија и тие репликите ги изговараат на мајчин јазик. Според драматургот Тамара Барачков, ова читање на „Отело“ е карактеристично по радикалниот пристап кон Шекспировите јазик и стил. Екипата интервенирала во „трансформацијата“ на јазикот и во „преведувањето“ во современ говор. Отело го игра Енес Салковиќ, Дездемона е Дарја Ризова, а Јаго е Саша Јанчиќ.
Ризова за СМАРТ СДК.МК вели дека целата соработка е едно прекрасно искуство за неа и дека јазичната бариера не им претставувала никаков проблем на актерите.
„Многу се убави чувството и искуството кога ќе отидеш надвор од државава, кога ќе се запознаеш со колеги од различни школи и земји. Ние толку се поврзавме што станавме еден организам кој живее и дише на сцена“, вели актерката.
Ризова кажа дека БиХ ѝ е при срце затоа што со претставата на Николиќ, „Разговори во четири очи“, гостувале и во Сараево и Бања Лука, а пред две години, на МЕСС во Сараево ја освои наградата за најдобра млада актерка за улогата на Електра во истоимената претстава на МНТ.
„Бидејќи нашата претстава беше огромна, не ја собираше во Народно позориште во Сараево, па ја игравме во Зеница. Имам убави спомени оттаму и низ целото искуство ме водеше убава енергија“, кажа глумицата, која е актуелна на репертоарот на МНТ со претставите „Галеб“ и „Бесачи“.
Шекспир е навистина сон на секој глумец, вели Дарја, особено што ретко се постaвува кај нас. Доверената задача да ја игра Дездемона за неа е чест, предизвик и, пред сѐ, одговорност.
„Со Нина и со моите колеги несебично и со свои сили го изодевме овој пат на создавање на претставата. Сѐ беше со труд, енергија, емоција и, пред сѐ, љубов кон нашата професија. Можам да посакам уште повеќе вакви копродукции, затоа што културната соработка претставува начин на поврзување на луѓето, што сметам дека е задача на нашата генерација“, рече Ризова.
Од Македонија играат и Ѓорѓи Јолевски, Александар Ѓорѓиески, Aлександар Михајловски и Аксел Мехмед, а од БиХ Џенана Џаниќ, Тамара Миличевиќ-Стилиќ и Златан Шкољиќ. Сценографијата е на Вишња Вујовиќ, костимите на Ивана Каранфиловска-Угуровска, а музиката на Дуке Бојаџиев. Репризата е в четврток.
Б. НЕСТОРОСКА
