Американскиот музичар и дизајнер Фарел Вилијамс ја претстави својата долгоочекувана втора колекција за „Луј Витон“ на Париската модна недела. Во машката колекција есен-зима 2024, Вилијамс маестрално ја прикажува својата уникатна визија, мешајќи ги дизајните на домородните Американци со модерниот луксуз.
Меѓу гостите на ревијата беа и актерите Бредли Купер, Омар Сај и Кери Малиган, а самата колекција беше енергична прослава на американскиот дух.
Дизајните ги истакнаа лабавите пропорции, одразувајќи го модерното сфаќање на класичните американски силуети. Машките и женските модели шетаа по пистата во кожни каубојски шешири, торби од говедска кожа и карирани тексас јакни, а на каубојските чизми се истакнуваа сјајни метални точки. Родео јакните блескаа со сложени везови, покажувајќи ја луксузната изработка, која е синоним за брендот во сопственост на „ЛВМХ“.
Вилијамс дебитираше како дизајнер во Париз минатиот јуни, а втората ревија ја имаше во Хонгконг во ноември.
