Ѓоре Ѓелев во Ликовниот салон во Велес ги изложи неговите дела изработени со кинеска калиграфија. Смета дека ова е првпат во Македонија да се организира изложба со оваа древна кинеска уметност. Се претставува со 30 дела пишувани во различни стилови, кои содржат мудрости од Конфуциј и древна кинеска поезија.
„Преку оваа уникатна и древна уметност сакам посетителите да ги доближам до кинеската култура и нејзиното разбирање. Во овој грст калиграфски творби можат да се сретнат повеќе видови скрипти. Вакви дела можат да се сретнат закачени во домови во Кина, како натписи на продавници и најави за настани и натпревари. Секое дело е автентично и го отсликува времето кога било создадено. Во делата се испишани древни кинески мудрости, поговорки и цитати од познати мислители, како Конфуциј и Лао Це и поети од времето на династијата Танг. Калиграфијата е посебен вид уметност, кој, може да се каже, е повеќе почитуван дури и од сликарството“, кажа Ѓелев.
Преку четирите богатства на калиграфијата: четката, мастилото, хартијата и каменот за растворање на мастилото, Ѓелев нѐ враќа илјадници години во стара Кина.
Изложбата ја организираат Народниот музеј во Велес и Клубот на писатели „Коста Солев Рацин“. Ја отвори кинескиот амбасадор во Скопје, Џанг Ѕуо, кој потенцираше дека калиграфијата не е само уметност, туку е важен дел од кинеските традиција и култура.
П. ПЕЧКОВ
