Од денеска (4 април) до 6 април, во КИЦ (Салон 19:19) во Скопје ќе се одржува Меѓународниот фестивал за кларинети Кларифест. Ова е седмо издание на фестивалот, што го организира Здружението за култура и уметност „Артистико“ од Скопје.
Фестивалот ќе се состои од семинари и концерти за кларинет, а гостуваат професори и интернационални солисти Николај Пфефер од Германија и Габор Варга од Унгарија (фото).
Фестивалот се отвора во 18 часот со концерт на ученици и студенти од музичките училишта и факултети во државата. Потоа ќе следат дводневни семинари за кларинет, кои ќе бидат од отворен тип.
Затворањето на фестивалот ќе биде со камерен концерт, на кој ќе настапат Пфефер на кларинет и Варга на кларинет и басет кларинет, во придружба на македонската пијанистка Елена Атанасовска-Ивановска. Влезот и за двата концерта ќе биде бесплатен.
