Изет Зеќири, професор на Универзитетот „Мајка Тереза“, економист и поранешен пратеник во Собранието, иако не е академски образован во областа на ликовната уметност, со својата петта самостојна изложба покажа дека уметноста не е само за професионалците. Тој преку самостојно учење, континуирана практика и неуморна страст длабоко навлегува во тајните на една од најтешките уметнички дејности – изработка на мозаик.
На изложбата насловена „Природата во камен“ тој на 35 мозаици го претставува своето видување на природата каде малите разнобојни камчиња се трансформираат во нов експресивен јазик.
„Ова е моја петта изложба и на неа имам изложено 35 мозаици. За нивната изработка сум користел камчиња од овој крај, посебно од Шар Планина, од Тетово, Охрид, Струга. Тешко е да се најдат вакви колоритни камчиња, потоа тие мора многу прецизно да се кршат и колоритно да се постават во мозаикот за да го искажат тоа што сум сакал да го претставам, а тоа е моето видување на природата, како езерата, планините и другите природни убавини. Ова се нови дела изработени за една година и ова е проект кој симболично е поддржан и од Министерството за култура и туризам“, вели Зеќири.
Иако како академик и професор има голем број обврски, сепак наоѓа доволно слободно време да се посвети на изработката на мозаици.
„Јас го применувам јапонскиот стил на делење на времето, а тоа значи една недела има 168 часови, од кои 56 часови се за работа, 56 часови за спиење и 56 часови за други активности. Ако украдеш по некој час од другите активности и од спиењето, тогаш ќе имаш доста време да го работиш тоа што го сакаш“, објаснува Зеќири.
З. АНДОНОВ
