Рап групата „Пука козметика“ прославува 30 години на сцената со концерт на 13 декември во Младински културен центар од 19:30 часот.
„Во киното Фросина ќе се раскажува приказната на групата од своите почетоци до денес. Во лобито потоа ќе има промоција на винил изданието ’30 години Пука козметика’ и коктел за присутните, за вечерта кон 22 часот во Денсинг салата да продолжи музичкиот дел со концерт на ‘Пука козметика’ и другарите“, велат од групата.
„Пука козметика“ е формирана во декември 1995 од браќата Жарко и Дарко Масларковски, заедно со Мартин Георгиевски и Видомир Андреевски. Следната година почнале да работат на свои авторски песни, а во 1997 попрофесионално навлегле во процесот на снимање и настапи. Првиот албум на групата е издаден во 2006, следува троен албум во 2012, како и многу албуми и соработки во „Токсикологија мјузик“.
Во повеќедецениското постоење групата имала многу самостојни концерти и настапи во Македонија и регионот, меѓу кои и како предгрупа на познати рапери од светот.
„Во периодот што следи најавуваме две нови песни од новиот албум, како и видеа и неколку фотосесии. Прославите на роденденот продолжуваат во 2026 во градовите низ Македонија“, велат од „Пука козметика“.
Билетите се продаваат преку мрежата на „Мк тикетс“.
