Влатко Лозаноски-Лозано го одржа најдобриот концерт досега, вчера (7 март) во салата „Борис Трајковски“. Во полна сала, со богата сценографија, проширен бенд, танчарки и гости, тој направи „километри љубов“, како што беше насловен концертот.
Бината беше проширена до публиката, а поп-пејачот повеќепати во текот на концертот се поздравуваше со фановите од сите генерации. На песната „Жена ко ти“ тој им подари ружи на жените од првите редови, како подарок за 8 Март.
Неговата сопруга Савка и синот Марко, кој има една и пол година, го следеа концертот, заедно со дуото „Некст тајм“. Пејачот погледна накај сопругата и синот на песната „Како тебе нема друга“ и ги поздрави со насмевка. На средината на концертот, тој го зеде синот со него на сцената.
Најемотивниот дел беше трибјутот за групата „ДНК“. Лозано испеа два хита од неговите пријатели кои загинаа во пожарот во Кочани и рече дека биле пријатели со години, а истиот продуцент е автор и на нивните хитови, Лазар Цветкоски.
„Се дружевме, ширевме љубов. Морам да го поздравам и нашиот продуцент Лазар Цветкоски, кој е дел од тој креативен свет. Дали може една голема минута аплауз за ‘ДНК‘?“, рече Лозано.
Тој одлично звучеше и на баладите на Тоше Проески и Миле Кузмановски. Песната „Мајко“ им ја посвети на сите мајки.
„Поздрав за мојата мајка. Таа е тука во публиката, со татко ми и сестра ми. Им благодарам, тие ми се голема поддршка“, рече Лозано.
Александра Јанева беше прва гостинка и со својот моќен глас ја збогати песната „Не те вадам јас од памет“. Лозано во дует со Никола Перевски-Пере го испеа хитот на „Нокаут“, „Лебедот бел“ и ја покани публиката на славеничкиот концерт на бендот на 9 мај во Скопје. Изненадување на вечерта беше Мики Јовановски-Џафер, кој во дует со Лозано ја испеа „Сонце за три света“, една од неговите омилени.
Публиката најгласно пееше на „Километри“ и „Јако јако“, а во текот на целиот концерт, Лозано го следеа танчарките од студиото „Бах“ од Струга и саксофонистката Александра Илиева. Концертот го збогати виолинистот Виктор Ангелов, кој свири со големи оркестри низ цела Европа, а дипломираше на Универзитетот Моцартеум во Салцбург. Концертот го отвори групата „Поп арт“.
Скромното момче од Кичево, кое почна во талент шоуто „Мак ѕвезди“ во 2007, заслужено стана една од најголемите наши поп-ѕвезди, градејќи ја кариерата постепено, со добриот глас и добрите песни. Негов менаџер е новинарот Васко Спасоски. На концертот го докажа овој статус, а многу колеги дојдоа за да го поддржат.
М. ЏАРОВСКА
