Kинотеката на Македонија во октомври ќе прикаже повеќе значајни македонски филмови кои годинава одбележуваат јубилеи, меѓу кои „Среќна нова ’49“, „Црно семе“, „Прашина“, „Тетовирање“ (фото), „Панкот не е мртов“ и „Мирно лето“. Програмата е замислена како своевидна карта на филмската меморија и потсетување на дела кои оставиле трага во историјата на македонската кинематографија.
Шеесет години од создавањето одбележува „До победата и по неа“ (1966) на Живорад Жика Митровиќ, 55 години „Македонски дел од пеколот“ (1971) на Ватрослав Мимица и „Црно семе“ (1971) на Кирил Ценевски, а половина век „Најдолгиот пат“ (1976) на Бранко Гапо.
Значајно место во програмата имаат филмовите на Столе Попов. „Црвениот коњ“ одбележува 45 години, а „Среќна нова ’49“, едно од неговите најпознати остварувања, 40 години. По повод 80 години од раѓањето на актерот Мето Јовановски ќе биде прикажан и „Тетовирање“ (1991), кој годинава одбележува 35 години од премиерата.
На програмата е и „Прашина“ (2001) на Милчо Манчевски, 25 години по премиерата, како и „Панкот не е мртов“ и „Ова не е американски филм“, кои одбележуваат по 15 години. Десетгодишни јубилеи имаат „Ослободувањето на Скопје“, „Златна петорка“ и „Џган“.
Посебен омаж ќе му биде посветен на Атанас Ацо Петровски, еден од пионерите на македонската кинематографија и прв директор на Кинотеката, по повод 25 години од неговата смрт. Ќе бидат прикажани неговите документарни филмови „Велигденски обичаи“, „Галичка свадба“ и „Дервиши“.
Октомвриската програма ќе ја заокружи „Мирно лето“ (1961) на Димитрие Османли, првиот македонски долгометражен филм режиран од македонски автор и првата македонска филмска комедија, кој одбележува 65 години. Покрај домашните јубилеи, ќе има и Денови на кинескиот филм, како и швајцарски, француски и германски филмски програми.
