Вечерва во 18 часот, во галеријата „Вива“ во Виена ќе се отвори изложбата на современ накит „Differences“ на македонските автори Јана Ацевска и Глигор Кузмановски, заедно со Симеон Шомов од Бугарија.
Изложбата е спој на тројца дизајнери на современ накит од две соседни земји, кои творат и експериментираат со различни материјали.
„Звучи хаотично! Да, но и одлична комбинација во исто време. Три посебни света, сплотени во еден простор со нивниот уникатен израз. Дали различностите треба да ги разделат луѓето? Секое парче накит е засебен експеримент, кое ја раскажува својата приказна и нѐ води на посебно доживување“, велат авторите.
