Да се побие митот дека еден производ треба да биде атрактивен за да се изложи и продаде е целта на годинашното, осмо издание на скопската Недела на дизајн, која трае до 25 ноември. Организаторите годинава ја поставија темата „Објективност“, а со своите креации и идеи, во Јавна соба се претставија 12 водечки студија за дизајн од Германија, која е избрана за земја во фокус.
Олга Биелавска е дизајнерка од Хамбург, родена во Варшава, која дипломирала на Баухаус универзитетот во Вајмар. На 25-годишна возраст, со колешката Астрид Шидкоф основала фирма за производи за секојдневен живот, но за време на светската економска криза во 2006 година, тешко им одело со инвестиции и се разделиле.
„Работев повеќе работи и потоа основав свое студио. Одлично е да работиш со некого. Јас, на пример, повеќе сум креативна личност и сакам да работам со некој кој е организациски тип. Тешко ми беше кога почнав сама да работам, посетував многу саеми за мебел и изложби. Во еден момент си поставив рок и почнав со 3-4 продукти“, ни рече Биелавска.
Во Скопје се претставува со повеќе производи, како нејзиниот прв индустриски дизајн, две огледала, и ламби од бакар. Радосно додава дека токму за ламбите добила нарачка за 200 парчиња од ресторан во Саудиска Арабија и дека сама ги пакува и го организира транспортот. Работи со различни материјали, стакло, бакар, графика и метал, затоа што дизајнот за неа не е ограничен само на едно нешто.
На младите дизајнери им порачува дека почетокот е тежок и дека за да соберат повеќе пари, корисно е да работат повеќе работи.
„Мене лично ми беа многу тешки првите години, правев прототипи и ги претставував, па бев ограничена да работам со фирми за евтини материјали. Почнав со мали чекори, но имав среќа да најдам фирми што ми ги произведуваат производите и инвестицијата се исплатеше“, рече таа.
Кристоф Хауф студирал во Пенсилванија, живеел во Њујорк и Берлин, а сега работи на основање на свое студио во Карлсруе.
„Во почеток работев за други, што на некој начин е аналитичко размислување, затоа што мора да дизајнираш за некој друг, но ти помага да развиеш што сакаш, а што не“, вели Хауф.
Во Јавна соба се изложени негови предмети, како огледала, полици и прототип на продолжен кабел.
„За мене се важни два принципи, отвореност и едноставност. Во однос на полиците, важно е дека може да се состават без алат, што е многу корисно при преселби. Едно од огледалата е во трапезоидна форма и не ви треба рамка за да го закачите. Што се однесува до продолжениот кабел, сакав да направам поедноставен модел. Тоа ми е нов производ, првпат го изложувам и стискам палци дека наскоро ќе најдам фирма која ќе го произведува“, вели Хауф.
„Бидете љубопитни и патувајте многу. Кога патувате ви се менуваат перспективата и начинот на гледање на нештата. Бидете љубопитни на сите полиња, не само во дизајн на производи“, е неговата порака за македонските дизајнери.
Дваесет и деветгодишната Лаура Герс по завршувањето на Академијата за уметност и дизајн во Кил во 2013 година била шест месеци на студиски престој во Шпанија. Била стипендист на „Вилерој и Бош“, работела во германска фирма за порцелан, а во 2016 година дипломирала дизајн на продукти во Берлин, со фокус на култура на поставување маси и готвење.
Засега работи како слободен дизајнер, но вели дека сака да работи во тим, да дели идеи и да учи.
„Сакам кога се учи еден од друг, не сакам кога работата се претвора во натпревар“, вели таа.
На скопската Недела на дизајн таа се претставува со маса сервирана со прибор за морска храна, проект кој годинава бил изложен во Франкфурт и за кој има нарачки од ресторани. Приборот е изработен од црн и бел порцелан, а специфичните линии на чиниите и лажиците се инспирирани од песочни структури.
„Сакав да ја донесам суровата материја на морето на маса и со тоа да бидете повеќе поврзани со природата“, ни рече таа и додава дека стаклените чаши се рачна изработка од фабрика во близина на Берлин и во нив може да се најде песок и токму затоа секоја е различна.
„На младите дизајнери би им порачала да бидат храбри, да аплицираат на натпревари, каде ќе се запознаат со луѓе од разни компании и особено со медиуми. Така може да добиете и понуди за работа и договори“, вели Герс.
Б. НЕСТОРОСКА
