Јапонскиот производител на видеоигри „Нинтендо“ исчекори од виртуелниот свет и го отвори својот прв тематски парк, заснован на неговиот најпопуларен лик Супер Марио. Новата атракција, што се наоѓа во рамките на забавниот парк на „Јуниверзал студио“ во Осака, се отвори со одложување од цела година поради актуелната пандемија, а во изградбата биле вложени 550 милиони долари.
„Совршено го доловивме светот од играта. Ќе ги пронајдете главниот непријател на Марио, Баузер, и пирани растенија во природна големина и ќе видите како е да се биде Марио. Овдека вие станувате Марио. Ни требаше една година подолго да го отвориме паркот и многу ни е мило што конечно се случи“, изјави Ајуму Јамамото, менаџерот за маркетинг и комуникации во „Јуниверзал студио“.
Паркот „Супер Нинтендо свет“ вклучува и учество во „Марио карт“, трка во аугментативна реалност.
Првата видеоигра „Браќата Супер Марио“ излезе во 1985 година и во меѓувреме стана една од најуспешните франшизи.
