Од лансирањето на својот истоимен бренд во 1973 до пензионирањето во 2002, Манфред Тјери Муглер ѝ пристапуваше на модната писта како да е театар. Прославениот француски моден дизајнер, кој почина на 73 години, зад себе остави наследство од смели колекции што беа предводници на структурираниот, декадентен стил кој стана познат како „моќно облекување“.
„Тој беше безвременски и пред своето време. Неговите облеки ги одразуваа жештината и сексуалноста на доцните 1970-ти и раните 1980-ти“, изјави супермоделот Џери Хол, заштитно лице на неговиот популарен парфем „Ејнџел“.
Името на Муглер е тесно поврзано со современата поп култура благодарение на соработката со бројни музичари како Дејвид Боуви, Бијонсе, Леди Гага, Ријана, Дајана Рос и Џорџ Мајкл, за чиј спот „Too Funky“ од 1992 ги дизајнираше сите костими.
