Твртко Крачун го претвори своето хоби во професија и работи на информирање и едукација за темата која во Хрватска сè уште е доста контроверзна – канабис. Тој го отвори првиот музеј на канабисот во Хрватска, кој се наоѓа во центарот на Загреб и го замисли првенствено како едукативен центар.
„Без лажна скромност, можам да кажам дека ова е најмодерниот музеј на конопот, покрај оној во Лос Анџелес. Амстердам има два музеја, од кои еден претставува приватна збирка, а во останатите европски земји може да се најде и во Берлин и Барселона“, вели Крачун.
Во неговиот музеј, посетителите можат да поминат низ богатата историја на конопот, да слушнат и научат многу за ова растение и да се изненадат од некои интересни факти.
„Во приземјето е поставка посветена на одгледувањето, а на горниот кат се три тематски уредени простории: за ритуална/рекреативна употреба, медицинска употреба и за универзалноста на канабисот, која покажува за што сè може да се користи ова растение“, вели Крачун.
