ЛУВР ИМАЛ РЕКОРДЕН БРОЈ ПОСЕТИТЕЛИ ВО 2018 БЛАГОДАРЕНИЕ НА СПОТОТ НА БИЈОНСЕ

Париз, (Гардијан)

Лувр, најпосетениот музеј на светот, објави дека минатата година го урнал својот рекорд во бројот на продадени влезници, за што придонесол и спот на Бијонсе и Џеј-Зи.

Во 2018, 10,2 милиони луѓе влегле во музејот, што е пораст од 25% во однос на претходната година и подобро од рекордот од 2002, кога имал 9,7 милиони посети. Лувр со тоа е најпосетен музеј од ваков тип на светот, пред Националниот музеј на Кина и Метрополитен во Њујорк.

Речиси три четвртини од посетителите на Лувр биле странски туристи, најмногу од САД и Кина, а повеќе од половина од вкупните гости биле помлади од 30 години. За ова значително придонесол спотот за песната „Apeshit“, што Бијонсе и Џеј-Зи го снимија пред некои од најпознатите дела во музејот. Тој е прегледан на Јутјуб повеќе од 150 милиони пати.

„Јасно е дека 2018 беше исклучителна година за меѓународниот углед на Лувр. Спотот на Бијонсе, како и отворањето на Лувр во Абу Даби придонесоа за нашиот музеј многу да се зборува низ светот, а со тоа порасна и бројот на посетители“, изјави директорот Жан-Лик Мартинез.