Македонските граѓани од 14 мај повторно ќе можат да патуваат во Грција, кога ќе се отворат граничните премини Богородица и Дојран.
Ова го објави министерот за здравство Венко Филипче на почетокот на помасовната имунизација против ковид-19, откако викендов пристигнаа 24.000 дози од вакцината на „АстраЗенека“. Откако претходно добиените вакцини беа наменети главно за здравствените работници, имунизацијата сега е проширена и на лицата над 77 години.
При влез во Грција, македонските граѓани ќе мора да приложат потврда за вакцинирање или негативен ПЦР тест. Грчката граница е затворена за македонските граѓани уште од 16 март минатата година.
Грција на 14 мај ја отвора својата летна сезона и министерот за здравство Никос Теохарис претходно кажа дека ќе се признаваат и руските и кинеските вакцини, иако тие сѐ уште не се одобрени во Европската Унија.
