Триесет и шест лица, вклучувајќи поранешен министер и актуелни пратеници во Собранието на Република Македонија, се приведени утринава во големата полициска акција, која за цел ги имаше учесниците во организираниот напад во парламентот од 27 април.
Основното јавно обвинителство за гонење на организиран криминал и корупција донесе наредба за спроведување на истражна постапка против овие 36 лица, кои се сомничат дека го сториле кривичното дело терористичко загрозување на уставниот поредок и безбедноста, што се однесува на упадот во Собранието на 27 април, кога беа повредени Зоран Заев и Зијадин Села.
Како реакција на апсењата, над 200 луѓе протестираа пред Кривичниот суд во Скопје, каде што се појави и лидерот на ВМРО-ДПМНЕ, Никола Груевски, кој ја опиша акцијата како политички прогон од страна на СДСМ и побара пуштање на слобода на притворените.
- Митко Чавков, поранешниот министер за внатрешни работи и директор на Бирото за јавна безбедност во МВР, е уапсен затоа што два часа не ѝ давал наредба на полицијата да интервенира вечерта на 27 април.
- Меѓу приведените се и пратениците од редовите на ВМРО-ДПМНЕ, Крсто Мукоски и Жаклина Пешевска, но судот побара симнување на имунитетот за уште четворица пратеници.
- Барањата за симнување на имунитетот се пристигнати во Собранието, но се чека враќањето на претседателот Талат Џафери од службен пат во Шведска, за да бидат отворени и разгледани.
- На распит во Кривичниот суд се и водачите на протестите „За заедничка Македонија“, Богдан Илиевски, кој е член на Извршниот комитет на ВМРО-ДПМНЕ, Игор Дурловски, Борис Дамовски и Владо Јовановски, кои се товарат дека го предводеле упадот во Собранието.
- За делото за коешто се сомничат приведените е предвидена казна затвор од најмалку десет години.
- Основното јавно обвинителство побара од Кривичниот суд да им изрече притвор на сите 36 приведени.
