Од денеска до 28 февруари 2021, во Музејот на современа уметност (МСУ) во Скопје ќе биде отворена ретроспективна изложба на Јован Шумковски, насловена „Вода/Ѕид“. Куратор на поставката е Зоран Петровски.
МСУ вели дека таа го прикажува делото на еден од најзначајните и највлијателни македонски уметници, чија речиси четиридецениска уметничка практика е дефинирана од постојан истражувачки интерес и смела инвентивност.
Изложбата „Вода/Ѕид“ е поставена во две галерии и ги содржи раните дела од средината на 1980-ите и поновиот циклус бриколажни инсталации, објекти, макети и видеа, настанати меѓу 2004 и 2017 година. Насловот на изложбата е преземен од едно од делата на уметникот како метафоричен сублимат на темите и содржините присутни во неговото творештво.
Сликар по вокација, Шумковски зад себе има над 20 самостојни изложби во земјава и светот (Белград, Сараево, Софија, Љубљана, Стокхолм, Париз, Њујорк). Во 1995 беше претставник на Македонија на Биеналето во Сао Пауло, а во 2001 на Биеналето во Венеција.
