Европскиот парламент ја поддржа предложената забрана за продажба на нови автомобили со внатрешно согорување од 2035 година, во обид да ја засили борбата против климатските промени преку побрзиот развој на електрични возила.
До средината на следната деценија, автопроизводителите ќе мора да ја намалат емисијата на јаглероден диоксид за 100%, а во 27-те земји-членки ќе бидат забранети нови бензински и дизелски автомобили.
Целта на новиот закон е и вкупните емисии на јаглеродниот диоксид од автомобилите да се намалат за 55% до 2030 година. Со ова е ставен дополнителен притисок врз автоиндустријата, која претходно беше обврзана да ги намали емисиите за 37,5% до крајот на деценијата.
На автомобилите отпаѓаат 12% од емисиите на стакленичките гасови во ЕУ, каде што 10% од жителите возат електричен автомобил. Се предвидува дека оваа бројка ќе биде тројно поголема до 2028.
