Европската вселенска агенција (ЕСА) се подготвува да ја лансира својата нова мисија, чија цел се Јупитер и неговите ледени месечини, на кои, според научниците, би можело да има услови за живот. Мисијата JUICE ќе изврши детаљни набљудувања на најголемата планета во нашиот Сончев систем и на нејзините три најголеми месечини Калисто, Европа и Ганимед, каде што се верува дека постојат потповршински океани.
Вселенското летало ќе биде лансирано утре во 14:15 часот, кога ќе го почне своето осумгодишно патување до Јупитер, оддалечен речиси 900 милиони километри од Земјата. JUICE ќе биде во орбитата на Јупитер до јули 2031, а мисијата ќе трае до 2035. Со оваа мисија ќе се истражуваат хемијата, структурата, динамиката, времето и климата на гасниот џин Јупитер и како функционира атмосферата без цврста планета под неа.
Примарната цел е, сепак, Ганимед, најголемата месечина во нашиот Сончев систем и единствена која генерира сопствено магнетно поле. JUICE ќе се доближи 500 километри до неговата површина и ќе го истражува тамошниот скриен океан. Се верува дека трите месечини содржат огромно количество вода, шест пати повеќе од количеството вода во океаните на Земјата.
(Фото: ЕСА)
