Во два холандски града започна продажбата на легално одгледана марихуана, во рамките на експериментот со кој државата сака да го регулира овој пазар. Целта на експериментот, кој се спроведува во Тилбург и Бреда, е да се овозможи продажбата на канабис чиј квалитет е контролиран и да се елиминираат илегални одгледувачи.
Наспроти широко распространетото мислење дека марихуаната е легализирана во Холандија, вистината е дека државата само ја толерира. Во Холандија е дозволено легално да се купат мали количини канабис, но одгледувањето е забрането.
Министерот за здравство Ернст Кујперс изјави дека се надеваат дека со регулирањето на продажбата ќе се добие подобар увид во потеклото и во квалитетот на производот.
„Покрај тоа, така ќе можеме да ги известуваме потрошувачите за ефектите и опасностите од консумирањето марихуана“, кажа Кујперс.
