Со 62 гласа „за“, Собранието синоќа ја избра новата влада, на чие чело ќе биде Димитар Ковачевски, новиот лидер на СДСМ.
- Четириесет и седумгодишниот Ковачевски е деветтиот различен премиер од осамостојувањето на Македонија, а доаѓа на местото на Зоран Заев, кој поднесе оставка по тешкиот пораз на СДСМ на ланските локални избори.
- Во новиот состав на владата, коалицијата „Можеме“ предводена од СДСМ има 11 министри, ДУИ шест, а Алтернатива три.
- Во владата на Ковачевски девет имиња се нови во однос на кабинетот на Заев.
- Бујар Османи и Оливер Спасовски ги задржаа функциите министер за надворешни, односно за внатрешни работи, додека одбраната повторно ќе ја води жена – Славјанка Петровска.
- Новиот коалициски партнер Алтернатива, меѓу другото, го доби Министерството за здравство, каде што Беким Сали го замени Венко Филипче, најекспонираниот министер во изминатите две години.
- Бисера Костадиновска-Стојчевска стана министерка за култура на 35 години.
