Македонските власти потврдија пет нови случаи на коронавирус во земјава, со што вкупната бројка порасна на 24. Тие најавија и воведување нови драстични мерки со кои Македонија дополнително ќе се изолира за да се спречи натамошно ширење на заразата.
- Четири од новозаразените се од Дебар, а позитивен тест има и жена која пред неколку дена се вратила од Холандија преку Виена.
- Претседателот Стево Пендаровски кажа дека сѐ уште нема потреба од прогласување вонредна состојба во земјата.
- По охридскиот, Владата донесе одлука за затворање и на Меѓународниот аеродром Скопје, што ќе стапи на сила задутре попладне.
- Од вечерва се затвораат сите гранични премини, освен за товарни и дипломатски возила.
- И двете најголеми партии СДСМ и ВМРО-ДПМНЕ побараа одложување на парламентарните избори, што се закажани за 12 април.
- По Италија и Шпанија, и Франција од утре ќе биде во 15-дневен национален карантин, додека претседателот Макрон најави и затворање на надворешните граници на Европска Унија.
- Од КОВИД-19 досега починале над 7.000 луѓе, а заразени се речиси 180.000.
