Две претстави од селекцијата за наградата „Биш“ играат вечерва (13 ноември) на Млад отворен театар (МОТ) во Скопје. МОТ и годинава ја доделува наградата „Биш“, иницијатива која почна лани, како дел од заложбите за поддршка и промоција на домашната, пред сè, независна сцена. На отворениот повик се пријавиле 25 театарски претстави од домашната независна продукција, а на фестивалот ќе бидат прикажани шест од нив.
Оценувањето на претставите го прави тричлено меѓународно жири. Наградата е именувана по еден од основачите на МОТ, Љубиша Никодиновски-Биш, кој почина лани.
„Вилицата на Ибен Бајерс“ ќе се изведе од 20 часот на малата сцена во Националната опера и балет, во режија на Борис Василевски. Играат Марјан Наумов, Ава Хусеини, Благојчо Стојанов, Томислав Давидовски, Јанка Лефкова, Гоце Андонов, Катерина Јовановиќ и Ана Грамосли
„Немиот келнер“ е закажана во 22:30 часот во МКЦ. Режисер е Александар Ивановски, а играат Васко Костовски и Мартин Ѓоргоски.
(Фото: Сцена од „Вилицата на Ибен Бајерс“)
