По шест години следење, викендов во националниот парк Маврово беше фатен рисот со ознака Б8, кој важи за најголем примерок досега регистриран на Балканот.
![](https://smart.sdk.mk/wp-content/uploads/2019/02/ris-612x410.jpg)
Тежок дури 27 килограми, тој беше фатен во специјална стапица во близина на селото Сенце и посебен тим од стручњаци и волонтери потоа му закачи уред, со помош на кој отсега полесно ќе може да се следи неговото движење и ќе се добиваат нови сознанија за овој подвид рисови.
Откако првпат бил забележан во 2013 година, Б8 бил снимен на камера на 12 различни локации низ паркот и новиот уред веќе почнал да дава податоци за неговото движење. Во наредните два месеца ќе може да се дознае многу повеќе за неговите навики на исхрана и живеење.
Сега кога Б8 конечно беше запознат одблиску, екипата „Балкан линкс“ покрена иницијатива да му се даде вистинско име на рисот, при што во опција се Бистри, Филип, Јован, Мујо, Сенко и Вир.