ПРОМОЦИЈА НА ДИГИТАЛИЗИРАНИОТ РЕЖИСЕРСКИ ОПУС НА БРАНКО ГАПО

Скопје, (СМАРТ СДК.МК)

Во Кинотека на Македонија, денеска во 12 часот ќе биде промовирано дигитално реставрираното творештво на доајенот на македонската кинематографија Бранко Гапо (1931- 2008).

Проектот ги опфаќа играните филмови „Денови на искушение“, „Време без војна“, „Истрел“, „Најдолгиот пат“, „Време, води“ и „Македонска сага“.

Настанот го организираат Управата за заштита на културното наследство и Кинотека на Македонија, матична институција за заштита на аудиовизуелното културно наследство, со поддршка од Министерството за култура.

Станува збор за настан кој е дел од годишната програма на УЗКН за одбележување на Европската година на културното наследство, која се спроведува под слоганот „Нашето наследство – европска вредност“ и мотото „Кон споделена одговорност за заштита на културното наследство“.

Кинотеката на Македонија од 2011 година до денес дигитално реставрираше и дигитализираше 15 играни, четири документарни и два краткометражни играни филма, меѓу кои: опусот на браќата Манаки, документарниот филм „Македонија во слики, 1923“ на Арсениј Јовков, опусите на Столе Попов, Љубиша Георгиевски и на Милчо Манчевски, како и филмовите „Татко (Колнати сме, Ирина)“ на Коле Ангеловски, „Хај-фај“ на Владимир Блажевски и „Жед“ на Димитрие Османли.