За својата нова песна „Дај на сонце“ (Дај на сунце), која се промовираше сношти, Каролина Гочева вели дека кога ја слушнала, веднаш ја замислила во нејзина изведба. Новите сингл и спот се наменети за регионалниот пазар, а песната ја работеа познати музичари.
„Приказната е тажна љубовна, веднаш ја замислив во моја изведба, а и таквите песни најмногу ми ги сака публиката. Ја сработив со босанска екипа, автор на музиката и текстот е Дино Мухаремовиќ, а аранжманот е на Дино Шукало, со кого сум соработувала и на претходен албум. Спотот го изработи Миомир Милиќ, фотограф и режисер од Србија, чија естетика многу ми се допадна и веднаш го замислив за оваа песна“, ни изјави поп-ѕвездата.
„Снимавме пред еден месец во Галичник и Маврово. Секако, беше вклучен и мојот тим Јована Зука, Дадар и Октај Сејди, како и моите од ‘Авалон’, па имавме еден незаборавен и поприлично ладен ден, ама сите сме задоволни од резултатот“, додава Гочева за снимањето на спотот.
Авторот на песната Дино Мухаремовиќ е гитарист во бендот на Дино Мерлин и познат сараевски студиски музичар, аранжер и композитор. Песната е снимена во неговото студио „Модра ријека“ во Сараево во октомври.
Мухаремовиќ е автор на баладата на Масимо Савиќ, „Допри ме случајно“ (Додирни ме случајно).
М. ЏАРОВСКА
