СКОПЈЕ ЌЕ ДОБИЕ ТРАМВАЈ БЕЗ ШИНИ, НОВ ВИД ПРЕВОЗНО СРЕДСТВО СО ПОГОН НА ВОДОРОД

Скопје, (СМАРТ СДК.МК)

Трамвај без шини со погон на водород е нов, еколошки вид на јавен превоз што Скопје ќе го добие следната година, потврди градоначалникот Петре Шилегов. Тендерот за набавка на новите возила ќе биде распишан до крајот на годината и планирани се две долги релации, Ѓорче Петров-Ново Лисиче и Бутел-Пинтија.

Според димензиите и функционалноста, таканаречениот треклес трем е ист концепт на транспорт како трамвај. Тој ќе се движи по една коловозна лента, која физички ќе биде одвоена од останатите две.

Кина е меѓу земјите која прва воведе трамвај без шини

„Од Ѓорче Петров до Ново Лисиче имаме добра инфраструктура и трамвајот би се движел во крајната лева лента. На втората делница ќе има градежни работи за проширување на улицата Цветан Димов и таму ќе се движи во крајната десна лента. Значи, градот нема да се прекопува за да се постави електрична инсталација, туку тој ќе се воведе побрзо и поевтино“, вели Шилегов.

Град Скопје планира да набави 60 возила за двете релации, кои ќе имаат капацитет од 250 патници. Планирано е на станица да има возило на секои три-четири минути. На овие линии нема да има автобуски превоз, па ќе се направи сосема нов концепт на автобуски линии.

Трамвај без шини не е ни трамвај, ни автобус и се движи на гумени тркала по градски улици. Тој е нов вид на превозно средство во светот и досега е воведен во Кина, Катар и Австралија.