Протеинските прашоци кои се продаваат без рецепт може да содржат поголемо ниво на олово и кадмиум, а најголемите количини се наоѓаат во растителните производи, според ново истражување.
Според Американската агенција за заштита на животната средина, не постои ниво на олово што е безбедно за луѓето. Кадмиумот е канцероген и токсичен за срцето, бубрезите, цревата, мозокот, респираторниот и репродуктивниот систем, според Управата за безбедност и здравје при работа на Министерството за труд на САД.
„Во просек, органските протеински прашоци имаат три пати повеќе олово и двојно повеќе кадмиум во споредба со неорганските производи“, рече Џејклин Боуен, извршен директор на Проектот за чиста етикета, непрофитна организација посветена на транспарентна грижа за храната.
Според извештајот, растителните прашоци како што се оние направени од соја, ориз, грашок и други растенија, содржат три пати повеќе олово од производите од сурутка.
Друг клучен извор на контаминација во протеинските прашоци се оние со вкус на чоколадо, според извештајот.
„Протеинските прашоци со вкус на чоколадо содржат четири пати повеќе олово и до 110 пати повеќе кадмиум од прашокот со вкус на ванила“, рече Боуен.
И покрај тоа што е богато со антиоксиданси и други корисни минерали, откриено е дека темното чоколадо содржи високо ниво на тешки метали.
За новото истражување се користени 160 производи од 70 најпродавани брендови на протеински прашоци.
Примероците од протеински прашок потоа беа испратени во лабораторија, која изврши речиси 36.000 индивидуални тестови на 258 различни загадувачи.
