Холивуд за момент го заборави сѐ поголемиот скандал со сексуално вознемирување во својата индустрија, за да оддаде почит на делото на Доналд Садерленд и на уште четири филмаџии, доделувајќи ги почесните оскари.
Осумдесет и двегодишниот Садерленд сними повеќе од 140 филмови за половина век кариера, но никогаш не бил ни номиниран за најпрестижната филмска награда.
„Ова е многу важно за мене, за моето семејство. Би сакал да им кажам благодарам на сите ликови што сум ги играл, затоа што го оформија и мојот живот“, изјави Садерленд на свеченоста во Лос Анџелес.
Анџелина Џоли ѝ го предаде почесниот Оскар на 89-годишната белгиска режисерка Агнес Варда, чија кариера почна со Новиот бран во 50-ите години од минатиот век, по што двете заиграа на сцената.
Посебни признанија од Академијата добија и режисерот Чарлс Барнет и снимателот Овен Ројзман, кој претходно имаше пет номинации за Оскар.
По четири авторски оскари, мексиканскиот режисер Алехандро Гонсалес Ињариту доби и почесна статуетка, за својата работа на краткиот филм во виртуелна реалност „Месо и песок“.
