Документарецот „Медена земја“ на режисерите Тамара Котевска и Љубо Стефанов од петок ќе почне да се прикажува во киносалите во повеќе градови низ Македонија. Филмот, кој е македонски кандидат за Оскар и е во трка за најдобар документарец на Европските филмски награди, освен во Скопје, ќе се прикажува и во Кратово, Штип, Крива Паланка, Струга, Битола, Куманово, Свети Николе и Охрид.
В петок во 20 часот ќе почне да се прикажува во Домот на културата во Кратово и во Домот на млади во Штип. Истиот ден во 19 часот ќе почнат проекциите во Центарот за култура во Крива Паланка. На 2 октомври е закажана првата проекција во Центарот за култура „Браќа Миладиновци“ во Струга, а од 3 октомври филмот ќе се емитува во „3Д кино“ во Битола и во МКЦ „Козјак“ во Куманово.
Следниот ден (4 октомври) документарецот ќе игра во Домот на културата во Свети Николе (19.30), а од 20 часот и во НУ Центар за култура „Григор Прличев“ во Охрид.
Покрај редовните проекции во скопското кино Синеплекс, филмот од пред неколку дена игра и во Милениум.
